Army ug Marines mangabot

Gikatakdang moabot sa Sugbo ugmang adlawa ang usa ka batalyon sa Philippine Marines ug Philippine Army isip kabahin sa mobantay sa pagpahigayun sa Asean Summit karong Disyembre.

Kini ang gipahibawo sa tigpamaba sa Central Command sa Armed Forces of the Philippines, Lt. Col. Jefferson Omandam.

Matud pa ni Omandam nga ang pagpangabot sa usa ka batalyon kabahin kini sa paningkamot sa kagamhanan sa Pilipinas sa paghatag sa seguridad sa mga pamuno nasud sa ASEAN ug kaubanang delegado sa nahisgutang international events.

"This is to show that we cannot afford to commit mistakes (in security matters) during the ASEAN Summit," matud pa ni Omandam.

Nunot niini, nanawagan si Omandam sa publiko nga ipasegarbo ang lakang sa militar sa paghatag og seguridad sa mga delegado sa Asean Summit.

Ang batalyon sa mga Marines ug Army sugaton kini sa mga lokal nga opisyal sa kagamhanan ug militar ingon man mga sakop sa media atol sa ilang pag-abot ugma.