P20 mil ug mga alahas nadala sa mga tulisan

Sobra sa P20 mil ang kantidad sa salapi ug alahas ang nadala sa duha ka wala mailhing tulisan gikan sa usa ka negosyante kagahapon sa kaadlawon diha sa South Reclamation Road habig sa sityo Uldog dakbayan sa Talisay.

Si Alfredo Caman, 36-anyos, taga Carmen Village sa nahisgutang dakbayan daling mitaho sa kapolisan sa Talisay human siya tulisa sa duha ka wala mailhing lalaki kinsa sakay og motorsiklo nga color yellow nga walay plaka.

Nadala sa mga suspetsado ang P19 mil nga salapi, silver nga kwentas nga nagkantidad og P4,500.00 ug gold plated nga relo nga nagkantidad og P3 mil.

Base sa imbestigasyon sa kapolisan sa siyudad nga si Caman nagsakay sa iyang tangkal-tangkal gikan sa ilaha paingon diha sa Tabunok.

Ang mga suspetsado kinsa armado og pusil ug kutsilyo mi-overtake ni Caman ug dayon gibabagan nila ang agianan sa biktima.

Gitiunan sa maong mga suspetsado sa dala nilang armas si Caman ug gimanduan nga ihatag ang salapi niini ug mga alahas.

Sa kahadlok ni Caman mituman na lang kini sa mando sa mga tulisan.

Ang mga suspetsado daling mibiya paingon dinhi sa dakbayan human sa maong insidente.