Gipasabot ni Garcia sa DyMR nga ang tumong sa PI mao ang pag-amendar lang sa pipila ka balaod sa konstitusyon ug dili kay ang hingpit nga pag-usab o revise niini.
Labing mibug-at ang sayop sa pitisyoner nga mao ang Sigaw ng Bayan ug Union of Local Authorities of the Philippines (ULAP) tungod kay ang PI supak sa balaod ug dili legal.
Kini tungod kay hangtod karon wala pa kaaprobahi sa Korte Suprema ang gitawag nga "enabling law" o balaod nga naghatag kagawasan sa PI nga ipresentar para sa cha-cha.
Midugang si Garcia nga pinaagi sa pagsalikway sa Korte Suprema sa PI, nasalbar ang administrasyon karon sa tinong kagubot ugma damlag tungod kay dili kapiyalan ang mga pirma lang sa mga Pilipino nga walay kasayoran sa tukmang paagi paggama og balaod ug ilabi na gyud ang pag-usab sa konstitusyon aron himuong parliamentarya gikan sa presidential nga porma sa pangagamhanan.
Nasayod ang tanan matud pa ni Garcia sa sangputanan mahitungod sa gipahigayong signature campaign sa mga lokal nga mga opisyal sa gobiyerno tungod kay kadaghanan gipapirma lang nga wa makasabot unsay ilang gipirmahan.
Si Garcia kinsa usa ka kanhi Kongresista nagkanayon nga dili sayon usbon ang batakang balaod ug busa ang gikinahanglang mutuon sa kausaban niini mao ang batid sa balaod nga maoy mahimong representante alang sa usa ka Con-con.
Miingon si Garcia nga pinaagi sa Con-con malinawon nga molawig ang nasud gikan sa presidential ngadto sa parliamentary ug makabaton pa ang Pilipinas og tinuoray gyud nga balaod, matud pa ni Garcia tungod kay ang mga representante sa Concon pinili usab sa katawhan.