Mao kini reaksiyon ni Osmeña human dul-an sa 40 ka mga video karera ang nasakmit sa mga sakop sa Criminal Intelligence and Investigation Branch (CIIB) atol sa gilusad nga pagpangronda niini didto sa Ermita kagahapon sa kaadlawon.
Dili motuo ang mayor sa mga gikatarungan ni Rupinta nga wala kini nahibaw-an sa ilegal nga operasyon sa video karera sa maong lugar.
Nagkanayon si Osmeña nga dili mahimong magpadayon ang operasyon sa video karera sa usa ka lugar kun wala kini kunsabo nga mga opisyal sa barangay ug mga sakop sa kapolisan.
Giangkon sa mayor nga ang Ermita maoy usa sa gi-problemahan niyang barangay dinhi sa dakbayan gumikan kay gawas sa suliran sa video karera naghitak usab ning maong lugar ang gidiling drugas sama sa shabu ug gani gibasehan sa mayor ang alegasyon nga pagkalambigit sa SK chairman mismo sa maong barangay nga si Carlo Magno Tude sa giingong pagpamaligya og gidiling drugas.
Usa sa nahunahunaan sa mayor nga ipahamtang nga silot ngadto kang Rupinta kun pabilin kining magpakabuta bungol pagsumpo sa video karera mao ang posibling pagputol sa ilang suod nga panaghigalaay.
Nasayran nga si Rupinta usa sa mga loyal nga political supporter sa mayor sa BOPK party.