Matud pa ni Engr. Antonio Cervantes, Presidente sa Talisay Senior Citizens Federation (TSCF) nga usa sa iyang nawarningan mao ang usa ka pribadong tambalanan sa dakbayan sa Sugbo gumikan sa kapakyas niini pagtuman sa balaod.
Kini sa dihang ang pasiyente nga miyembro sa (OSCA) Office of the Senior Citizens Association sa Talisay mireklamo kay wa siya hatagi og 20 porsiyento diskuwento sa tagdumala sa maong tambalanan.
Matud pa ni Cervantes nga miangkon ang mga hingtungdan sa ilang sayop busa iyang gipasidan-an nga sa sunod higayong supakon nila ang balaod, dihadiha sang-atan dayon silag kiha ngadto sa hukmanan.
Miingon si Cervantes nga isip lider sa mga edaran dili siya magpanuko paghimog imbestigasyon niadtong mga kan-anan, tindahan sa tambal, sakyanan sa yuta, kahanginan ug kadagatan ug bisan sa mga sinehan nga dili motuman sa balaod.
Subay sa balaod, ang mga SC, may katungod sa pagpahimulos sa 20 porsiyentong diskuwento sa mga tambal, sakyanan, kan-anan, sinehan ug uban pang mga establisamento.
Apan matud pa ni Cervantes nga naghitak ang mga reklamo sa iyang mga sakop sa Talisay hinungdan nga siya mismo maoy nangunay sa pag-imbestigar sa mga hingtungdan.
Si Cervantes kinsa kanhi usa ka pari ug enhinyero usab sa tinuod nga kinabuhi, nagkanayon nga dili siya moatras kon maoy pasipad-an.
Kini tungod kay una sa tanan nasayod siya sa balaod, ug ang ikaduha mao nga aron mapitol kadtong way pagtahod sa balaod ilabina sa mga edaran na.