Si Belleza mitataw kagahapon sa pakighinabi niini sa Banat News nga gipatawag niya ang mga dispatser sa Tabunok aron maklaro ang gidusong reklamo sa mga drayber diha sa iyang buhatan nga kilkilan sila sa maong mga dispatser.
Ang nahisgutang mga dispatser mihimakak sa maong mga pasangil batok kanila.
Matud sa bise mayor nga gibutyag sa mga dispatser nga dunay mga grupo sa mga maldito uban niini dili taga Talisay nga mo-estambay diha sa Tabunok nga maoy mangilkil sa mga drayber ug usa ka sakop sa nahisgutang grupo ang nakulatahan sa mga dispatser tungod sa ilang kalagot nga sila maoy napasanginlan sa gibuhat niini ngadto sa mga drayber.
Si Belleza midungag nga ang nahisgutang mga dispatser wala hatagi og pagtugot nga mangilkil ngadto sa mga drayber hinungdan nga iya kining ipasikop sa mga polis.
Kahinumduman nga sa milabay'ng mga semana ang grupo sa nagpakabanang drayber sa Tabunok miduso og reklamo ni Belleza kabahin sa pagpangayo og "tong" sa mga dispatser diin P5 ang pangayo inig agi nila ug laing P5 kun makatabang kini og panawagan og pasahero.
Kun dili sila miyembro diha sa grupo dili sila tugotan nga maka-estambay sa lugar aron makapasakay og pasahero.
Ang nahisgutang mga drayber mireklamo usab nga ang mga polis nga nadestino diha sa lugar maghinan-aw lang dili mobadlong sa mga dispatser nga nangilkil kanila.
Kahinumduman nga si Supt. Romeo Perigo, hepe sa kapolisan sa Talisay mibahad usab nga ipatawag niya ang habig sa mga drayber ug dispatser aron kini ma-imbestigahan kun adunay maduso nga reklamo diha sa iyang buhatan.
Pa-imbestigahan usab niya ang mga polis nga dili mohimo og lakang kabahin sa maong problema kun aduna usab siya'y pormal nga reklamo nga madawat batok sa mga nahisgutang mga polis.