Nahitabo kini alas 12 sa udto niadtong miaging adlaw sa Sabang, Danao.
Giila ang namatay nga mao si Pedro Roble, hingkod ang panuigon nga taga Binaliw, Danao ug drayber sa PUJ nga nagdala sa plate number YDT 642.
Samtang ang mga pasaherong naangol mao sila si Dionesio Pasajul ug Susan Durano, hingkod ang panuigon nga mga lumolupyo sa maong dapit.
Ang managsuong sila si Maria Luisa Caralde, 8 ug Ruan Caralde, 12 nga nagtungha sa Sabang Elementary School nadagit usab sa PUJ ug nangaangol.
Si Inspector Rodrigo Giango, hepe sa kapolisan sa nahisgotang lungsod nga gikahinabi sa Banat News miingon nga gikan sa dakbayan sa Sugbo ang PUJ ug paghidangat sa maong dapit kalit lang kining nabangga.
Dali nga gidala sa tambalanan ang mga biktima ug si Roble nga drayber niini mitahan ngadto kanila apan pipila ka gutlo sa pagtahan kalit lang kining giatake sa high blood.
Matud pa ni Giango dali nilang gidala si Roble sa Danao District Hospital apan ang mga doktor mideklarar niining patay human sa pipila ka gutlo.