Si Col. Oscar Lasangue, hepe sa Civil Relations Group (CRG) sa Central Command namahayag sa DYMR Radyo ng Bayan Cebu nga karong anaa na sa ilang kamot si Luciano Puro, uban sa asawa niining si Roselyn Nura ug duha ka mga anak, hingpit nga proteksyon sa kinabuhi nila maoy hatagan og prayoridad sa militar.
Si Puro, kinsa maoy front-2 vice platoon commander sa CPP-NPA nga nanguna sa kalihukan sa mid-north sa lalawigan sa Sugbo, gidala dayon ngadto sa Centcom headquarters human siya mopahigayog courtesy call kang Mayor Estrella Aribal sa Catmon niadtong Martes.
Matud pa ni Lasangue nga kun may dala pang armas si Puro, bayran unta dayon kini'g kuwarta sa kagamhanan tungod kay kalampusan kini sa kampanya sa gobyerno.
Miingon si Lasangue nga dili sila gustong panimawsan sa iyang mga kaubanang rebelde si Puro.
Nagtuo si Lasangue nga nasayran na karon malagmit sa mga kadagkoan sa CPP-NPA ang pagsurender ni Puro ngadto sa gobyerno.
Si Lasangue miingon nga gitun-an na usab nila karon ang bahin sa kapuy-an ni Puro uban sa iyang pamilya.
Bahin sa panginabuhi, si Lasangue nagkanayon nga dako usab og papel dinhi si Gobernador Gwendolyn Garcia sanglit kabahin kini sa kampanya nga gihiusahan sa kagamhanan sa lalawigan ug sa nasud.
Si Puro kinsa lumad nga taga barangay Kinabyonan Catmon, namiyembro sa NPA niadtong 1999 ug maoy mipatay sa tulo ka mga sundalo didto sa barangay Sumon, Tuburan niadtong Oktobre 15, 2005.
Gisukit si Lasangue kun may kaso bang isang-at ang militar batok ni Puro, siya igo lang mitubag nga ila pa kining estudyohan.