Nangluba og hayopan gipatay sa 2 polis

Patay ang usa ka 26-anyos nga lalaki human napusilan sa mga polis sa dihang nagdala og sundang ug nanigbas og mga hayopan sa miaging adlaw pasado alas 10 sa Villahermoso, Pilar isla sa Camotes.

Dead on arrival si Joseph Seberiano, lumad nga taga Cabarasan, Dulay, Leyte ug walay tinong pinuy-anan sa nahisgutang lugar.

Ang nakapusil mao sila si Insp. Danilo Delantar hepe sa Pilar ug PO3 Al Garciano sa dihang gisuwayan sila og tigbas niini.

Si Seberiano naigo sa iyang lawas ug sa tuong paa ug daling gidala sa Municipal Health Center sa Pilar apan patay na kining naabot.

Segun sa report nga midangat sa Cebu Provincial Office Police nga si Seberiano giingon nagdala kini og sundang ug kutob sa maagian nga hayopan iya kini tigbason ug dunggabon nga maoy nakapaalarma sa mga tawo ug sa kapolisan.

Si Sr. Supt Vicente Loot, hepe sa kapolisan sa probinsiya sa Sugbo atol sa press conference kagahapon miingon nga walay tulubagon ang duha ka polis, apan adunay imbestigasyon kun dunay moreklamo.