Usa pa ka buwan ang milabay nga nag-abot ang duha ka lider alang sa peace covenant sa buhatan ni Sr. Supt Vicente Loot sa Cebu Provincial Police Office.
Ang samdan sa walang dughan ug uban pang bahin sa kalawasan mao si Joel Hermoso, 26, ulitawo nga taga relocation site, Naga miyembro sa Tau Gamma Phi.
Gitumbok nga nakapusil mao si Jay Paner ug ang igsuon niini nga si Jehzel pulos mga miyembro sa Akrho ug lumolupyo sa South Poblacion sa maong lungsod.
Si SPO4 George Canomon sa Naga Police Station mitug-an sa Banat News nga ang biktima uban sa lain pang duha ka kauban nagbarug-barog sa second floor sa municipal building niadtong higayona.
Apan kalit lang miabot ang managsuon dayong bunot sa .38 kalibre sa armas ug nipusil sa biktima sa makadaghang higayon.
Matud ni Canomon nga nag-abot kining duha ka miyembro sa fraternity niadto pang Domingo sa gabii ug nagbinaharay kini. Siyam ka sunod-sunod nga buto ang nadunggan sa mga tawo sa silong sa munisipyo.
Human sa pagpamusil daling misibat ang duha ka suspek.
Sa hot pursuit operation sa kapolisan nasikop si Jehzel Paner sa ilang panimalay.
Si Jehzel nakuhaan og usa ka .38 kalibre sa armas ug upat kabuok uhas sa indian pana
Ang hepe sa Naga nga si Supt. Renato Malazarte nga nahinabi sa Banat News kagahapon sa opisina ni Loot sa Provincial Police Office nagkanayon nga sa milabay'ng katuigan wala mahitabo nga dunay nagpinusilay atol sa pagsaulog sa pista.
Gihulagway ni Malazarte si Hermoso nga usa ka badlungon sa katilingban gani napusilan na kini kaniadto sa iyang sakop.
Si Loot sa iyang bahin atol sa press conference kagahapon miingon nga wala makaapektar sa nagpadayong sabotsabot sa mga kadagkuan tali sa Akrho ug Tau Gamma ang maong panghitabo sa miaging gabii sa Naga. — Uban sa report ni Romeo T. Limpangog