Duha gikan sa diskohan gipareglahan

Duha ka tawo gikan pa sa ilang pagtambong og disco ang kalit lang gipamusil nga maoy nakaingon sa ilang pagkaangol ug usa kanila ang anaa sa kritikal sa miaging tungang gabii sa Upper Tambok, dakbayan sa Mandaue.

Ang mga biktima mao sila si Christopher Descartin, 31 ug Joel Cuizon, 23, pulos ulitawo nga mga lumolupyo sa Lower Tabok sa mao gihapong dakbayan.

Ang suspetsado nga namusil sa mga biktima mao si Rosmer Albano alyas Buwad, hingkod ang panuigon ug taga Paknaan sa maong dakbayan kinsa gipangita human makasibat.

Si PO3 Robert Hugo, imbestigador sa Presinto 3 sa Basak Police Station nga gikahinabi sa Banat News nagkanayon nga si Descartin nakabaton og samad pinusilan sa iyang bitiis.

Ug duha usab ka samad pinusilan sa buko-buko ang naangkon ni Cuizon kinsa unang gidala sa Mandaue City Hospital apan gibalhin kini sa Gullas sa Banilad.

Matud pa ni SPO3 Hugo nga ilang gituohang paregla lang gayod ang maong pagpamusil sa suspetsado ngadto sa mga biktima kinsa padayon karong gipangita.