Alang sa mayor posibleng dili unta kini mahitabo kun nagparehistro pa ang maong mga establisamento sa modernong alarm system karon sa dakbayan nga gitawag og MARS.
Kini tungod kay ubos ning maong sistema nga konektado sa City Hall automatic unta dayon nga madawat sa kapolisan kun dunay motumaw nga pagpanulis kun ang biktima nga kompaniya nakarehistro sa maong alarm system.
Gitumbok sa mayor ang nahitabong pagpanulis niadtong miaging adlaw sa A1 Micro Financing Corp. sa Jones Avenue ug sa Asia Link sa may dalan Gorordo nga pulos nakuhaan og linibo ka pesos.
Matud sa mayor dili angay'ng mabasol ang kapolisan niining maong mga panghitabo gumikan kay walay mahimo ang kapolisan kun dili moabag ang publiko ilabi na gyud ang nahisgutang mga establisamento nga maoy target sa pagpanulis.
Dunay bayranan nga tag P2,000 matag bulan alang sa magparehistro nga kompaniya aron makapahimulos sa maong modernong alarm system
Niining higayona hatagan og prayoridad sa mayor nga makapahimulos niini mao kadtong mga pawnshop, lending firm, money changer ug uban pa. Ang mga bangko mibalibad na nga moapil sa maong programa.