Matud pa ni MCIAA general manager Danilo Augusto Franzia sa niaging 888 News Forum sa Parklane Hotel nga P50-milyones ang gigahin sa pagbutang og VIP Lounge diin adto abi-abihon ang mga moabot nga delegado sa Asean Summit gikan sa 18 ka mga nasud.
Sumala pa ni Franzia nga 30 porsyento na ang nahuman sa proyekto ug ilang gitinguha nga makompleto na unya sa Nobiyembre 30. Ang P30-milyones gigahin usab alang sa overlaying sa aircraft parking aprons ug ang nahabilin nga P20-milyones alang kini sa lighting.
Sa iyang bahin si MCIAA operations chief, Captain Romeo Bersonda, nipasabot nga ang aircraft parking space gibahin kini sa tulo nga mao ang aircraft parking apron, military bitominous apron ug commercial apron.
Ang tibook luna makapaigo sa walo ka mga lagpad nga abyon ug 14 ka kasarangan nga abyon samtang usa ang reserba.
Giklaro usab ni Bersonda nga gawas sa inprastraktura, ila usab gitutukan ang aspeto sa seguridad ug kalimpyo sa tugpahanan.