Si Wenceslao Nudera, 50-anyos, residente sa Ramona Village II, San Isidro ang mitaho sa kapolisan sa Talisay kabahin sa nahitabong lungkab sa iyang balay.
Nakuha sa wala mailhing kawatan ang upat ka relo de pulso nga Rado, Seiko ug Citizen nga mikabat tanan sa P20 mil ang kantidad, tulo ka digital camera, P80 mil ug P50 mil nga salapi.
Base sa imbestigasyon sa kapolisan sa Talisay nga mikatkat sa koral sa balay ni Nudera ang kawatan ug gibuak niini ang bildo nga bintana sa kusina ug giligwatan og bara ang door knob sa mga kwarto diin nahimutang ang vault nga gisudlan sa nahisgutang salapi ug mga butang nga nawagtang.
Sa laing bahin mitaho usab sa kapolisan sa Talisay si Rey Seguerra, 38-anyos, residente sa Lawaan I kabahin sa pagkawagtang sa iyang unom ka roll nga copper tube nga nagkantidad og P15 mil ug duha ka roll nga electrical wire P4 mil.
Base sa imbestigasyon sa kapolisan sa Talisay, si Rey mipasangil sa iyang pag-umangkon nga si Michael Seguerra, 20-anyos nga maoy nagkuha sa nahisgutang mga wire.
Gibutyag ni Rey ngadto sa mga polis nga si Michael diha nagpuyo sa ilang balay ug pag-abot niya gikan sa trabaho wala na ang suspetsado lakip na ang maong mga butang.
Si SPO1 Noel Factores, desk officer sa kapolisan sa Talisay nagkanayon kagahapon sa buntag sa Banat News nga laing uyoan ni Michael ang mibutyag nga nakita niya ang suspetsado nga dunay dalang sako.