Ang nangamatay giilang sila si Earl Rodrigo Lumaing, 23, taga dalan Logarta, tinun-an sa University of Southern Philippines, lumad nga taga Guiuan Eastern Samar, Miles Oliver Cortez,16, taga Borongan Eastern Samar ug nagpuyo sa dalan Bonifacio, tinun-an sa University of Cebu ug Millard Montederamos, 22, taga Maasin City ug kasamtangang nagpuyo sa dalan Ibarra sa samang barangay ug utility boy sa Bureau of Customs.
Sumala pa sa usa ka saksi nga nakakita sa hitabo usa ka lalaking nagsuot og stripe nga sinina nga mestisuhon ang mipusil sa tulo sa walay igong hinungdan.
Ang mga biktima matud pa sa mga higalang mga tinun-an usab kasamtangang nagduwa og 'magic card' diha sa gawas sa usa ka apartment sa Mercedez building niadtong tungura dihang kalit nga giduol sa suspek.
Pito ka basiyo sa kalibre .45 nga bala, usa ka buhing bala sa 45 kalibre, ug duha ka slug ang narekober diha sa crime scene.
Matud pa sa mga saksi, human sa pagpamusil yanong milakaw ang suspek padulong sa eskina sa dalan Zamora diin usa ka motorsiklo ang nagpaabot nga nagpunay na og pa-revolution sa makina.
Usa sa mga kauban sa mga biktima nga si Yves Nillas, nga usa usab ka tinun-an naswertehan nga misulod sa apartment aron pag-inom og tubig dihang mipaka-paka ang buto sa armas diha sa gawas.
"Nag-inom man ko og tubig nakadungog nalang ko nga nagbuto-buto na, paglili namo sa gawas naghigda na si Earl, unya si Millard nagpangayo og tabang," asoy pa ni Nillas sa pakighinabi sa Banat News.
Sa pagkakaron ang Homicide Section wala pay matumbok nga posibleng motibo sa pagpamusil sanglit walay nakahatag og kumpletong background sa mga biktima, apan dunay mitug-an nga dili mga sakop sa fraternity ang duha.
Si Supt. Pablo Labra sa pakighinabi nagkanayon nga tanang anggulo ilang tukion sa maong insidente lakip na ang pagsuta sa personalidad ni Montederamos isip trabahante sa BOC.
Samtang susihon usab kung tinuuray ba nga dili miyembro sa fraternity ang duha ka mga tinun-an sanglit ang gikahitaboan sagad agianan ug tapukanan sa mga sakop sa mga fraternity.
Si Lumaing gideklarar nga dead on arrival tungod sa igo diha sa walang dughan ug likod, liog ug likod usab ang igo ni Cortez kinsa nakabsan usab sa kinabuhi pila ka minutos human madangat sa Cebu City Medical Center, samtang si Montederamos namatay usab pagka-alas 4:20 sa kaadlawon kagahapon tungod sa igo niini diha sa liog, wala ug tuong bitiis, tuong bahin sa dunggan ug tapsing diha sa tuong ilok.
Ang uyoan ni Montederamos nga si Antonio Resos ang Chief, Port Operation Division sa Cebu Customs District Office.
Si Montederamos usa ka non-organic member sa BOC apan nadestino isip assistant sa customs gate keeper sa container yard sa CIP.
Gihulagway sa mga kaubanan niini nga maayong tawo si Montederamos ug wala kini malambigit sa mga ilegal nga kalihukan sa adwana.
Wala usab magtuo ang mga sakop sa customs nga adunay kalambigitan sa iyang trabaho ang nahitabong pagpusil patay niini.
Si Resos nanghinaut nga masulbad ang kamatayon sa iyang pag-umangkon ug mataral sa hukmanan ang responsable niini.