Giluwatan kining maong opisyal nga pamahayag sa mayor atol sa press conference kagahapon gumikan kay tuyo niya nga masayran sa mga Sugbuanon nga wala siyay laing tuyo sa pagbabag niining maong transaksiyon aron maseguro nga makabaton og barato nga tubig ang tanang mga konsumidor sa MCWD sa Metro Cebu Area."
"I will give my own statement, if Ayala change the offer to less than P20 then I will keep my mouth shut," dugang asoy ni Osmeña.
Gihimong basehanan sa mayor ang gitanyag sa ubang mga lokal nga supplier sama sa Cebu Bulk Water Consortium ni Jose Alvarez nga mitanyag og minus sa P20 kada metro kubiko.
Giklaro sa mayor nga dili siya makadawat nga padayong paboran ang tanyag sa Ayala nga tag P25.5 kada metro kubiko nga unta duna may ubang mga supplier ang mitanyag og mas barato nga tubig.
Gipasabot sa mayor nga bahala na og dili kuhaon ang gisukip sa maong kasabutan nga pagpabayad og P200 milyones ngadto sa challenger unya sa Ayala basta ang importante nga maminusan lang ang presyo sa tubig niini nga mahal ra kaayo kun itandi sa ubang mga supplier.
Giklaro ni Osmeña nga pagkakaron dili una siya mosakay kabahin sa isyu kun kinsa tali nila ni Gobernaador Gwendolyn Garcia ang adunay gahum pagtudlo og mayoriya sa mga sakop sa board sa MCWD tungod kay gusto una sa mayor nga masulbad kining maong problema.
Gikonsiderar ni Osmeña nga gusto lang sa mga tawo nga nagpaluyo sa Ayala-MCWD bulk water deal nga matabunan ang isyu hinungdan nga giduso karon ang pag-kwestyon sa iyang appointing authority sa MCWD board.