JV Ejercito modagan pagka-senador sa 2007

Bisan wala angkona ni San Juan Mayor Joseph Victor Ejercito nga modagan siya pagka-senador karong umaabot nga piniliay sa 2007, dunay mga pagdudang ang pag-anhi niini dinhi sa Sugbo usa lang ka paagi aron mailhan siya sa mga Sugboanon.

Kagahapon mismong ang isyu sa mga eskwater dinhi sa Metro Cebu ilabi na diha sa palibot duol sa gitukod nga CICC sa dakbayan sa Mandaue iyang gihisgutan.

Matud pa ni Ejercito nga mangita siya'g paagi aron tabangan ang mga eskwater nga giplanohang laroton tungod sa nagsingabot nga ASEAN summit.

Matud ni Ejercito nga ang problema unta sa nahisgutang mga pamilya ang angayang isentro karon sa gobiyerno og dili ang "charter-change" ug uban pa.

Nagplano si Ejercito nga makigkita sa mga pamilyang maapektohan sa demolisyon para mapiho kung permamente na ba silang papuy-on sa luna nga ilang balhinan.

Giklaro hinuon niya nga wala niya gamita ang sitwasyon aron makabirada sa kagamhanan apan bisan pa man dili kalikayan ang mga hugon-hugon nga sa gibuhat niini karon posibleng modagan gyud kini isip senador.

Dili usab malikayan nga ang uban nga mga lungsoranon nagtuo nga ang gibuhat ni Ejercito dunay kalambigitan sa pamolitika.

Sa laing bahin, si Edward Ligas lider sa Urban Poor nagkanayon nga hangyoon niya si Ejercito nga mopahigayon og parallel summit para sa mga lider sa Urban Poor sa nasud para matuki ang mga problema sa Urban Poor, lakip sa kauban ni Ejercito kagahapon mao ang karaan nga suporter sa iyang amahan nga si Punta Prinsesa barangay Kapitan Jose Navarro.

Show comments