Ang bahad nagikan kang manlalaban Alex Tolentino, presidente sa Integrated Bar of the Philippines Cebu City chapter, kinsa nahinaway pag-ayo sa mga magsisibya nga mipadasig sa mga vigilantes aron moalsa na usab.
Sa sayo pa nakaingon si Mayor Tomas Osmeña nga mihasi karon ang mga kriminal tungod kay mikalma ang mga vigilantes.
Apan iyang gipasangil ngadto sa taga media ang pagpadasig sa mga vigilantes aron pagpangihaw og mga tawo.
Sukad niadtong Disyembre 2004, mikabat na sa 160 kapin ka kinabuhi ang gipasangil nga gipatay sa mga vigilantes ning siyudad.
Si Tolentino sa iyang bahin misaksi gyud nga siya mismo nagpaniid niining usa ka estasyonan sa radyo dinhi sa Cebu nga gikan sa magsisibya ug sa ilang mga kaubang mga komedyante magpunay og hagit sa mga vigilante nga palihukon na.
Matud pa niya nga gitinguha ning maong magsisibya uban sa pagtugot sa tagdumala sa estasyonan nga modaghan ang pinatyanay pinaagi sa mga vigilante.
Alang kang Tolentino nga kini usa ka dakong sayop nga idolohiya ug dako kaayong kalapasan sa balaod.
Ang buhat sa mga vigilantes, pareho ra sa buhat sa mga tulisan nga sayon ra kaayong honusan sa kinabuhi ang tawong ilang makursonadahan.
Busa miingon si Tolentino nga sa dili pa niya ipahibawo sa Malacañang kining maong magsisibya ug ang estasyon nga wala una niya hinganli, makigtagbo una siya kang Edward Abad, presidente sa Kapisanang mga Broadcaster sa Pilipinas, Cebu Chapter aron ipabadlong hingtungdan.