Ang gipasakaan og kaso mao sila si Julius Damgo, 25, nga taga Inuburan, Naga, lumad nga taga Proper Dimaya, Pagadian City; Ricky Prete, 29, taga San Fernando ug lumad nga taga Panagaan, Mahayag Zamboanga del Sur; Magdalino Tulin,nga taga Canjulao, Lapu-Lapu City ug lumad nga taga Mahayag, Deloso, Zamboanga del Sur ug Hermigildo Golez, nga taga Clarita Village sa barangay Labangon ning dakbayan.
Si Golez gi-pick up sa Theft and Robbery Section pila ka oras human mahitabo ang pagtulis sa magtiayong Bernadeth ug Francisco de Gracia Jr. diha sa eskina sa Concepcion ug Garfield sa barangay Pasil.
Lakip sa gipasakaan mao ang usa sa tulo ka mga armadong tulisan nga gituyo og hagbong sa mga kauban diha sa dalan Lakandula nga si Jessie Sta. Ana, lumad nga taga Poblacion, Dumingag sa Zamboanga del Sur.
Si Sta. Ana nakulatahan sa mga tawo ug nakuhaan og kalibre 45 pistola nga may lima ka buhing bala. Si Sta. Ana miangkon sa iyang kalambigitan sa pagpanulis ug mitug-an sa kapolisan sa ubang impormasyon kabahin sa iyang mga kauban.
Gipasakaan usab og kaso ang magtiayong sila si Mikay ug Cecil Dumpa ug ang duha nga naila lang sa mga pangalan nga Roger ug Nonoy pulos taga Zamboanga del Sur.
Matud pa ni Chief Inspector Ambrocio Ibones sa TRS sa pakighinabi sa Banat News nga managkunsabo gyud ang grupo ug si Golez maoy 'finger man' kun maoy impormante sa mga suspek diha sa maong merkado.
Dugang pa ni Ibones nga gawas sa mga impormasyon si Golez usab ang mipakaon sa mga tulisan ug mihatag og armas ngadto sa grupo samtang nagplano pa sa ilang pagtulis.
Si Golez linudhan sa kasal sa mga de Gracia ug wala magdahum ang mga biktima nga unayon sila niini.
Matud pang Ibones base sa nakuhang cellphone gikan sa mga dinakpan, nagduda si Ibones nga nahutdan na og kwarta ang duha apan nagtuo siyang nakaipsot na silang duha lakip na sila si Roger ug Nonoy.
Nagduda karon si Ibones nga ang maong grupo mao usab ang mga tulisang miigo sa mga fish dealers sa Pasil niadtong milabay'ng tuig ug si Golez usab ang posibleng mitumbok sa mga target.
Nanawagan karon si Ibones sa mga biktima sa pagpanulis diha sa Pasil ug sa ubang dapit sa pagsusi sa mga suspek diha sa ilang buhatan aron mapasakaan usab sila og kaso.