Mga-uuma gipusil sa tanod sa Barili

Usa ka mag-uuma naangol human kini gipusil sa tanod samtang wala mopatuo sa dihang gibadlong gawas sa diskohan alas 2 sa kaadlawon niadtong Domingo didto sa Sitio Cantavo, Gunting, Barili.

Segun sa report nga midangat sa Cebu Provincial Police Office ang biktima kinsa nalandig sa tambalanan human makaangkon og usa ka samad pinusilan sa kalibre .38 paltik rebolber diha sa walang bukton mao si Jose Sabanal Sr., 56, minyo, nagpuyo sa Maigang, Barili.

Apan walay suwerte ang suspetsado nga si Geroge Guzman, 43, nagpuyo sa nahisgutang lugar kay nadakpan sa kapolisan sa gihimong manhunt operation human kini misuway og sibat human sa hitabo.

Gipangunayan ang manhunt ni Insp. Ricardo Labura Nayne uban sa iyang mga sakop sa Barili Police Station.

Matud pa sa kapolisan nga samtang nag-duty si Guzman sa diskohan nunot sa kapistahan sa maong lugar ang biktima nga si Sabanal miabot ug wala magdugay nakakita kini og lalis sa mga tawo.

Hinungdan nga gibadlong sa suspek apan giingon wala kini mopatuo og gipusil hinuon.