Kini dihang natino nilang dunay mga sakop sa media nga mikober sa maong hitabo ug alang kanila makauuwaw sa ilang mga pamilya ug mga anak ug sa mga nakaila kanila.
Ang maong police line up gihimo aron sa pagtino sa suspek kung si kinsa ang mitulis ug mipatay sa tigpatanto diha sa dalan T.Padilla niadtong milabay'ng Sabado nga si Pilar Hernandez ug sa sekretarya niining si Wevina Pancho.
Usa sa mga polis nga nakadawat na og daghang pahalipay tungod sa mga maayong nabuhat sulod sa 18 ka tuig niining pagserbisyo pagkapolis diriyot nakahilak sa sitwasyong ilang gikahimutangan uban sa pito pa ka mga polis.
"Demoralizing kaayo, makadaut sa among pagkatawo, naa gud mi mga anak,"asoy pa sa usa sa mga polis sa Banat News.
Matud pa sa maong mga polis nga dili makatarunganon nga iladlad sila susamag mga kriminal gumikan lang nga ang ilang apelyedo ug pangalan susama og tono sa gitug-an ni Hernandez dihang gidagan kini pangadto sa tambalanan.
Hinuon mipasabot ang mga polis nga isip maayong polis mosunod sila sa maong police line up basta eksklusibo lang kanila ug sa mga testigos apan walay mga sakop sa media nga mokober, ug diha nalang ipagawas sa media ang tawong maoy itudlo sa mga testigos nga maoy kriminal.
Si Chief Inspector Juanito Enguera mipatawag sa onse ka mga polis gikan sa nagkadaiyang police stations sa CPPO apan siyam ra niini ang mi-report sa ilang buhatan.
"Dili man sila gi-subject for humiliation, ang kinahanglan man gud nato personal nga presensya nila," pagpasabot pa ni Enguera.
Si Sr. Supt. Vicente Loot sa CPPO mimando sa maong line up agig kooperasyon sa imbestigasyon sa mga sakop sa Homicide Section sa Cebu City Police Office human mitumaw nga polis sa CPPO ang posibleng suspek nga gitumbok sa biktima.
Si SPO2 Jay Yballe sa Homicide Section mitug-an nga kadtong duha ka wala makatungha ipatawag gihapon ug ibutang sa susamang line up apan giklaro ni Yballe nga wala sila magduda kung nganong wala makatungha diha ang duha pa ka mga polis.
Miangkon si Yballe nga naglisod sila karon sa pagpangita sa suspek tungod kay wala makakita sa mismong hitabo ang ilang duha ka testigos.
Nasuta sa dugang imbestigasyon nga dunay kauban ang suspek nga nagsakay og motorsiklo.Matud pang Inspector Erlando Metante nangaon pa diha sa atbang ug mipalit og load ang suspek una pa kini misulod sa PRH Lending Investment Inc.