Gusto sa mayor nga pasagdan lang una ang organisasyon sa Philippine National Police (PNP) ug walay laing law enforcerment unit ang tugotang makapanghilabot og imbestigar sa pagtulis ug pagpatay kang Pilar Hernandez, asawa ni retiradong Col. Jacob Hernandez nga nanag-iya sa PRH lending Investor nga nahimutang sa T. Padilla, Tejero.
Apil sa gipatay ang secretary sa biktima nga si Wivina Pancho apan sa wala pa mamatay ang biktima nakalitok pa kini og pangalan sa usa ka polis nga maoy ilang gitumbok nga responsable sa krimen.
Giangkon dayon ni Osmeña nga klaro na kaayo nga usa ka polis ang responsable sa krimen apan bisan pa niini hatagan gihapon og higayon sa mayor ang kapolisan paglimpyo sa ilang pangalan pinaagi sa pagsulbad sa maong krimen.
Gipasidan-an sa mayor ang kapolisan nga kun mapakyas kini pagsulbad sa maong kremin susama ra nga gidasig sa PNP ang uban pang mga nanglayas nang kriminal nga mobalik sa pagpuyo dinhi sa dakbayan.
Labaw sa tanan ang gihulagway sa mayor nga ang panghitabo nga susama niini maoy makaguba sa tibuok organisasyon sa kapolisan ilabi na kun dili masulbad bisan pa man ug dili ikalimod nga dunay daghang mga polis ang nagtinarong sa serbisyo ug maihap lang ang mga badlongon.