'Pusher' ug laing lima dakpan sa Danao

Usa ka suspetsadong pusher og shabu ug laing upat ka drug personalities ang nasikop sa gipahigayong pagpangronda sa kapolisan niadtong Biyernes sa hapon diha sa dalan Olivar, barangay Poblacion dakbayan sa Danao.

Si Jose Arje Mapula Tabla, 31-anyos, residente sa maong lugar nasakmitan sa mga polis og 29 ka paketeng shabu, 30 ka plastik nga gamiton og putos sa ginadiling drugas ug P6,615 nga salapi nga gituohang gikan sa ilegal nga kalihokan.

Ang laing upat nga nasikop kinsa mga residente sa nagkalain-laing barangay sa Danao giila nga si Alex Martel Roble, 34, residente sa barangay Binaliw, Ritchel Mica Banzon, 32, usa ka mekaniko taga Ilaya Cogon Cruz, Jovert Telano, 20, nagpuyo sa barangay Taboc Looc ug Welmar Calderon Lawas, 28, taga barangay Quisol, ang upat nasikop diha sulod sa balay ni Tabla.

Ang maong pagpangronda gipangulohan ni Police Superintendent Larson Decheno, hepe sa kapolisan sa siyudad ubos sa ayuda sa Philippine Drug Enforcement Agency (PDEA).

Dala sa mga polis ang search warrant nga giluwatan ni Regional Trial Court (RTC) Judge Meindrado Paredes sa branch 13 batok ni Tabla.

Si SPO1 Jose Relampagos, polis sa Danao nagkanayon kagahapon sa pakighinabi niini sa Banat News nga posibleng ang upat manuyopay.