Matud pa ni Col. Oscar Lasangue, hepe sa Civil Relations Group (CRG) sa Central Command nga sukad kaniadto kapin na sa 4,000 ka mga sakop sa "cause oriented groups" ang giunay og ihaw sa mga New People's Army (NPA) apan ang krimen didto ihapak sa militar.
Ang pamahayag ni Lasangue maoy iyang tubag sa pasangil ni Jaime Paglinawan tsirman sa Bayan sa Cebu kinsa mikondinar sa militar sa kamatayon ni Victor Olayvar kinsa gipusil patay niadtong Huwebes sa buntag didto sa barangay Cantubod, Danao, Bohol.
Alang kang Lasangue nga kon dili personal nga dumot ang namatyan ni Olayvar, way duhaduha miabot na dinhi sa Visayas ang purging system sa mga NPA.
Niining tuiga ang maong sistema sa nabaniog pag-ayo didto sa Luzon, dayon sa Mindanao ug karon nia na sa Kabisay-an, matud pa ni Lasangue.
Apan miingon si Lasangue nga bisan unsaon nilag pasangil sa militar, ang taga Bohol nasayod nga way labot ang mga sundawo sa gobiyerno sa kamatayon ni Olayvar.
Apan midugang si Lasangue nga mas maayo pang mokompiyansa ang mga militanteng grupo sa militar kay sa NPA, kay ang militar moprotekta sa ilang katungod.