Pamilya mikondenar sa paagi pagsikop sa 2 ka 'rebelde'

Gikondenar sa pamilya sa duha ka suspetsadong opisyal sa rebeldeng New People's Army (NPA) nga nasikop niadtong Biyernes sa gipahigayong entrapment sa sakop sa Criminal Investigation and Detection Group (CIDG) diha sa Lawaan, Talisay ang paagi sa pagdakop sa duha.

Ang mga nasikop giila nga si Gerard Lavadia alyas Renard Castelo, Juan Miguel Saycon ug Ka Renard ug Sharon Abangan, kalihim sa Central Visayas Regional Party Committee ug team leader sa NPA hit squad.

Ang duha gipasanginlang nangilkil og kwarta sa mga magpapatigayon diha sa naasoy'ng lugar.

Si Lavadia ug Abangan gikatahong naaktuhan nga midawat og salapi gikan ni Meliton de los Santos, general manager sa Solid Earth Development Corporation kaubang kompaniya sa Taheiyo Cement Corporation ug ni Jerome Paz, senior manager sa Taheiyo Cement Factory sa lungsod sa San Fernando.

Nasakmit sa mga otoridad gikan ni Lavadia ug Abangan ang P250 mil nga salapi nga gituohang kinilkil nila gikan sa nahisgutang kompaniya, usa ka laptop computer, usa ka fragmentation grenade ug duha ka kalibre .45 nga armas.

Ang duha gitugyan kagahapon sa buntag diha sa Talisay City Jail sa Maghaway.

Si Esmeraldo, amahan ni Abangan, nagkanayon nga dili siya motuo sa mga pasangil batok sa iyang anak tungod kay usa lang kini ka manindahay og isda.

Dihang nakahibalo siyang gisikop ang iyang anak dali siyang mianha sa Talisay Police Station dayon sa Camp Sotero Cabahug apan wala siya tugoti nga makigkita sa iyang anak.

Ang inahan ug igsuon ni Abangan dili usab makatuo sa mga pasangil batok sa suspetsado.

Sa laing bahin, mga 300 ka residente sa Sityo Salvador Barangay Tanke diin magpuyo si Abangan mipirma sa gipahigayong signature campaign sa Bantay Dagat Association.

Si George Mabanag, secretary general sa nahisgutang grupo, mibutyag nga si Abangan, dugay nang miyembro sa ilang asosasyon ug wala kini criminal record.

Si Jun Jardinico, secretary general sa Karapatan mipasangil nga ilegal ang pagsikop sa duha ka aktibista tungod kay wala kini warrant of arrest ug usa ka kalapasan sa batakang balaod ang gibuhat sa mga otoridad.

Matud ni Jardinico nga ang maong lakang pagpamatuod sa pagpatuman sa "all-out war" batok sa mga terorista nga gilusad ni Presidente Gloria Arroyo ug gisuportahan usab ni Gobernador Gwendolyn Garcia.

Ang grupo sa Karapatan uban sa Anakpawis nanawagan sa pagpalagpot ni Garcia sa pwesto.