Ang mga biktima giilang sila si Ricky (apelyedo gipugngan)17, ug Joe Marie,(apelyedo gipugngan)16, pulos residente sa Sapangdaku, Mandaue kinsa padulong na untang mopauli gikan dinhi sa Sugbo luwan sa usa ka pasaheroang PUJ.
Ang suspek nga gitumbok nga midunggab kanila giilang si Rub Hansen Diva Pleñoz, 18, residente sa Nangka lungsod sa Consolacion ug gitumbok nga sakop sa Bloods gang.
Sumala pa sa imbestigasyon ni SPO2 Rey Cuyos, ang tulo parehong luwan sa usa ka PUJ padulong sa dakbayan sa Mandaue dihang pag-abot sa dalan Kaoshiong sa Mabolo kalit nga miulbo ang panaglalis sa tulo ug nisangpot sa sinumbagay.
Ang suspek daling mibunot og usa ka icepick ug gipanunggab ang duha, si Ricky naigo diha sa iyang tiyan, sampot ug tuong tuhod samtang si Joe Marie nadunggaban diha sa iyang walang kilid sa lawas diin nag-ungot pa ang icepick hangtud nga gidala sila sa Mandaue City District Hospital ug gibalhin sa Vicente Sotto Memorial Medical Center.
Ang suspek malinawong mitahan ngadto nila ni SPO1 Emmanuel Enolpe ug PO2 Remegio Arciaga sa Station 2 sa Mandaue City Police Office human sa insidente.
Ang maong buhatan na maoy mi-turn-over kang Pleñoza ngadto sa Cebu City Police Office alang sa pagpasaka og kaso karong adlawa.
Ang Bloods ug Crips maoy mga gang sa mga batan-on nga kasagarang miyembro niini mga menor de edad ug nalambigit na sa daghang insidente sa krimen dinhi sa lalawigan sukad pa niadtong 2004.
Nagtuo ang kapolisan nga gumikan kini sa mga nakitang mga website diha sa internet diin ang maong mga grupo dunay mga video footages sa mga rambol, pinusilay ug dinunggabay gikan sa gawas nga mahimong tan-awon sa mga miyembro.