Ang biktima mao si Alen Alvarico Pangatungan, 30, minyo ug nagpuyo sa Kauswagan, Brgy. Bankal dakbayan sa Lapu-Lapu.
Base sa pasiunang imbestigasyon ni SPO2 Rolito Jumao-as sa Homicide section sa kapolisan sa dakbayan sa Lapu-Lapu posibleng gumikan sa illegal nga drugas ang motibo sa pagpatay sa biktima.
Si Erlinda Pangatungan, inahan ni Alen, mitug-an ngadto kang SPO2 Jumao-as nga sa milabay'ng mga adlaw adunay kanunay'ng maningil sa iyang anak (Alen) sa halin sa shabu ug mao kini ang gidudahan nga maoy hinungdan sa kamatayon sa iyang anak.
Ang maong pamahayag gidasunan kini sa mga silingan sa maong dapit ug maoy anggolo nga gisunod karon sa kapolisan sa Lapu-Lapu ang pagkalambigit ni Pangatungan sa pagpamaligya sa shabu nga wa iremmit ngadto sa iyang gikuhaan sa maong drugas.
Ang biktima nakahiagom og 20 ka samad dinunggaban sa nagkalain-laing parte sa lawas ug gidudahan nga duha ngadto sa tulo ka tawo ang mitabang og dunggab niini gumikan sa nagkalain-laing matang sa mahait nga hinagiban ang nakitang samad sa biktima.
Hinuon padayon pa ang imbestigasyon nga gihimo sa homicide section sa kapolisan sa Lapu-Lapu aron sa pag-ila sa responsable sa kamatayon ni Pangatungan.