Ang gidakop giilang si Aileen Loreto, nga residente sa nahisgutang lugar pinasikad sa search warrant nga giluwatan ni RTC Branch 13 Judge Meinrado Paredes tungod sa ilegal nga drugas.
Sumala pang CIIB chief, Pablo Labra nga si Loreto dugay nga gi-surveillance sa kapolisan tungod sa pagpayuhot og ilegal nga drugas, matud pang Labra nga ilang gidudahang gikan sa Mindanao ang suplay sa shabu nga nakuha gikan sa suspek.
Ang CIIB inubanan sa mga sakop sa Special Weapons And Tactics nakakuha og tulo ka medium size nga may sulod nga gidudahang shabu, usa ka electronic weighing scale, duha ka improvised funnels (imbodo) ug cash nga P1,276 nga gituuhang halin sa gidiling drugas.
Si Loreto nga gikahinabi sa Banat News mihimakak sa pasangil ug mibutyag nga manindahay ra siya og sud-an. Gipanghimakak usab niya nga iya ang maong balay sanglit iya kini sa iyang inahang tua sa gawas sa nasud nga naminyo og langyaw kinsa umaabot usab ugmang adlawa.
Matud pang Loreto ug mga iyaan niining mibisita sa selda sa CCPO kagahapon nga bisan ang siyam ka bulan nga anak niini ug laing duha pa ka mga bata gipagawas diha sa balay samtang gisiksik ang balay.
Ang ronda gisaksihan sa duha ka mga tanod sa maong barangay ug mga sakop sa media.