Ang gidakop sa Subpoena and Warrant Section giilang si Eugene Amacna,20, taga Sawang-Calero ning dakbayan. Si Amacna miangkong sakop sa Alpha Kappa Rho fraternity.
Ang grupo nila ni SPO1 Orville Batas, SPO1 Venancio Roque Jr. ug SPO2 Felipe Nonong nakasigpat kang Amacna diha sa dalan El Felibusterismo sa barangay Duljo-Fatima hinungdan sa iyang pagkaaresto.
Sa imbestigasyon sa Homicide Section mitumaw nga gisuspetsahan si Amacna nga maoy kauban sa laing tulo ka mga sakop sa Akrho (mga ngalan gipugngan) ug maoy miatang ug mipusil sa biktimang si Brenjun Taborada,16, nga residente sa Missionaries sa barangay Suba niadtong hapon sa nahisgutang petsa.
Ang biktima nananghid sa iyang inahang si Leonilla nga moadto sa sitio Wakwak aron mangasilyas dihang kalit nga giatangan sa grupo ug walay daghang pangutana gipusil kini sa likod diin ang bala milagbas sa dughan niini.
Daling nangikyas ang mga suspek samtang si Taborada daling gidala sa Cebu City Medical Center diin kini gideklarar nga dead on arrival.
Si Amacna dihang gikahinabi sa Banat News kusganong mihimakak sa pasangil apan miangkong kaila niya ang laing tulo pa ka mga suspek diha sa warrant of arrest nga giluwatan ni RTC Judge Manuel Patalinghug sa branch 22.
Matud pang Amacna nga 'naalaan' ra siya sanglit wala siya sa maong dapit dihang nahitabo ang pagpamusil.