Gitug-an sab sa maong mga molupyo sa ilang suwat reklamo nga gipadala ngadto kang Konsehal Edgardo Labella nga nahasol usab ang pagtungha sa ilang mga anak adlaw- adlaw human gipasirad-an sa pamilyang Aznar ang ilang 'road right of way'.
Tungod niini mopalabang og resolusyon si Konsehal Labella atol sa sesyon sa konseho karung sunod semana nga mag-awhag sa Department for the Welfare of the Urban Poor (DWUP) ug City Engineering's Office sa pagsusi sa kabalido sa maong reklamo.
Ang maong mga pamilya nag-okupar kini sa luna nga gipanag-iya sa gobyerno diha sa Gil Tudtud ug ang sikbit niining luna nga gihimong road right of way gipanag-iya sa pamilyang Aznar.
Si Labella nga maoy tsirman sa committee on laws sa konseho mi-insister nga bisan pa og usa ka pribadong luna ang maong lugar nga gihimong agianan sa publiko dili gihapon kini balidong rason aron hikawan sa gobyerno ang mga apektadong pamilya sa ilang gipangayo nga serbisyo.
Gibasehan ni Labella ang probisyon diha sa Local Government Code of 1991 nga naghatag og gahum sa lokal nga kagamhanan pag-atiman sa kaluwasan ug konbinyinting panglihoklihok sa mga konstituwenti niini.