'Bakla'g nga bugas sa NFA ipasusi ni Pacaña

Tungod sa mikatap nga balita nga gisagolan og daut na nga mga bugas humay ang mga NFA rice nga gipamaligya dinhi sa dakbayan sa Sugbo gitinguha karon sa mga opisyal ning dakbayan ang subsob nga imbestigasyon sa mga hingtungdang ahensya sa gobiyerno aron makonpirmar ang maong taho.

Gibati og kabalaka si Konsehal Arsenio Pacaña nga piligro na sa panglawas ang maong mga daut na nga bugas humay nga giingong gipangsagol sa mga NFA rice nga gipamaligya karong barato aron makaabot niini ilabina kadtong mga kabus nga molupyo.

Tungod niini, mopalabang og resolusyon si Pacaña nga mag-awhag sa National Food Authority,Market Operations Division (MOD) ug Local Price Coordinating Council (LPCC) nga mohimo og imbestigasyon.

Gibati og tukmang kabalaka ang konsehal ilabi na kun matinuod ang maong report gumikan kay maghatag man unya kini og peligro sa mga Sugboanon nga sagad mopalit gyud og NFA rice gumikan kay barato ra man ang presyo niini kun itandi sa ubang klase sa bugas humay.

Nunot niini, mi-apilar usab ang konsehal sa paghingusog sa mga hingtungdang ahensya sa gobiyerno pagbungkag niining maong matang sa binuang aron malikay sa kadaut ang publiko.

Hinuon giklaro sa konsehal nga dili pa alarming ang mga migawas nga balita may labot sa giingong pagpamaligya og mga daut na nga bugas humay dinhi sa dakbayan ug ang ubang paagi niini nga isagol sa NFA ang maong mga depektoso nga bugas aron kini mahalin.