Ang gidakop giilang si Moon Se Ik, 25, taga South Korea ug kasamtangang nagpuyo diha sa Windland Tower ning dakbayan.
Sa gihimong imbestigasyon sa kapolisan gikatahong dunay misukmag kaniya hinungdan sa iyang pagkasuko ug gipahimungtan ang bildong pultahan ug namuak og mga baso diha sa maong diskohan.
Matud pa ni SPO3 Reolito Jacalan sa Mabolo police station sa pakighinabi sa Banat News nga posibleng nahubog pag-ayo si Ik maong nagwala kini ug namuak sa sulod hinungdan sa pagpanggawas sa mga kustomer.
Ang mga sakop sa Mobile Patrol Group nga sila si PO1 Esteñoso maoy mikuha kang Ik ug gidala sa Mabolo police station sanglit ang maong establisamento mireklamo sa pagwala niini.
Si Steve Sumalinog nga maoy representante sa maong establisamento mireklamong gumikan sa pagwala ni Ik namiya ang mga kustomer ug wala makabayad nga mikabat og P10,000 samtang nabuak usab sa maong langyaw ang mga baso ug mga platong nagkantidad tanan og P15,000 ug ang bildong pultahan nagkantidad og P30,000.
Hinuon gipagawas ra gihapon ang suspek sanglit gikatahong nagkasabot ang duha ka habig sa ilang problema.
Si Ik dihang gipangutana sa mga sakop sa media igo rang mimustra nga dunay misukmag kaniya apan wala siya makaila niini gawas lang nga usa usab kini ka Koreyano.