Kini ang nasayran sa Banat News kang SPO1 Roderick Roma sa kapolisan sa nahisgotang lungsod sa gihimong pagpakighinabi kagahapon sa hapon.
Ang duha ka mananagat nga gipangita mao sila si Ronnie Mercandal, 26 anyos, ulitawo ug Kid Geminez, 38 anyos, minyo nga pulos taga barangay Granada sa nahisgotang lungsod.
Nagluwan ang duha ka mananagat sa gamay nga motor banka nga gituohang nakasugat kini og dagkong balud nga maoy hinungdan nga wala kini mahiuli.
Matud pa ni SPO1 Roma nga si Granada Barangay Kagawad Pablo Trapero maoy mitaho sa ilang buhatan niadtong Biyernes sa hapon human modangop ang mga kabanay sa maong mga mananagat.
Subay sa gisugilon sa mga kabanay nga ang duha nga sagad managat og nukos nga sakay sa gamay nilang motor banca nga mogikan og Huwebes ang mamauli gayod labing dugay sa udto sa adlaw nga Biyernes.
Si SPO1 Roma miingon nga kuyog sa pipila ka mananagat nga nagsakay og dagkong pump boat ug misubay sa kadagatan sa silingang lungsod sa Argao, Bato, Santander hangtod na sa kadagatan sa Bohol apan napakyas gayod sila sa pagkaplag niini.
Si Petty Officer 3 Francisco Mandal sa Philippine Coast Guard nga nagbase sa Sugbo nga gikahinabi sa Banat News miingon nga ilang nadawat ang taho ug nitabang na sila pagpangita.