Ang maong granada nakit-an sa mga lumalabay diha sa dalan S. Osmeña atbang sa edipisyo sa Cebu Ports Authority sa Cebu International Port diha sa North Reclamation Area.
Usa ka field trainee nga naila lang sa ngalan nga PO1 Olaer nga gidestino sa maong lugar isip route security maoy gipahibalo sa mga nakakita sa granada ug mao usab ang mitawag sa Explosives Ordnance Division sa Special Weapons and Tactics sa Cebu City Police Office.
Si SPO1 Marcelo Lerio sa EOD-SWAT sa pakighinabi sa Banat News nagkanayon nga usa ka Mark II fragmentation grenade ang maong granada.
Gituohang gituyo kini og labay sanglit wala na kini safety pin ug ang safety lever niini nga maoy nagpugong sa pagkadlit sa pulbura diha sa fuse niini wala na diha.
Tungod sa kabalakang mobuto kini bisan unsang orasa, gidali kini og dala ngadto sa South Reclamation Project sa grupo ug didto gipaulbo.
Wala pa matino ni Lerio kun kinsa maoy milabay niini ug kung kanus-a kini gilabay.
Ang maong dapit maoy usa sa gikatahong daghang mga rotang posibleng agian ni Arroyo paggikan sa Malacañang sa Sugbo aron pagtambong sa kalihukan diha sa dakbayan sa Lapu-Lapu.
Apan si Sr. Supt. Agosto Marquez nagkanayon nga wala mosulod sa Cebu City si Arroyo atol sa pag-anhi kagahapon.