Ang duha ka dinakpan nga pulos minor de edad nga nagtungha sa ikatulong ang-ang sa sekondarya ang nakuhaan og siyam ka linikit nga pinaugang dahon sa marijuana.
Si SPO1 Wilfredo Catorsa sa Liloan Police Station nga gikahinabi sa Banat News miingon nga ang nakadakop sa duha ka tinun-an mao ang magtutudlo sa maong tunghaan nga si Mr. Ignacio del Rosario.
Matud pa ni SPO1 Catorsa nga ang ilegal nga kalihukan sa duha ka tinun-an namatikdan sa mga magtutudlo sa maong tunghaan sa nangagi pang mga bulan.
Dugang pa niya nga mipatawag og tigom ang prinsipal sa maong tunghaan ug maoy gikasabotan sa mga magtutudlo ang paghimo og buy bust operation.
Si SPO1 Catorsa miingon nga si del Rosario migamit og laing tinun-an sa pagpalit og marijuana ug sa akto sa pagtunol dali usab nga gisignit sa magtutudlo ug nasakmit ang ebidensiya nga linikit sa pinaugang dahon sa marijuana ug marked money nga gigamit sa pagpalit niini.
Ang duha ka dinakpan temporaryo karong gitanggong sa Liloan Police Station ug gikatakdang pasakaan og kaso nga kalapasan sa Akta Republika 9165 kun Comprehensive Dangerous Drug Act of 2002.