Ang nasikop mao si Daryl Verallo, 18, Bernie Anislagon, 25, ug Medardo Baruga, 22, pulos mga ulitawo nga nagpuyo sa maong dapit.
Matud pa ni PO2 Joseph Andrin sa Station 1 sa Mandaue City Police Office nga dunay mitawag kanila ug mipahibalo sa dapit diin nagpadayon pa ang gihimong pot session sa mga lalaki hinungdan sa pagresponde dayon niini.
Atol sa pag-abot sa mga elemento sa kapolisan sa Station 1 nasakpan sa akto ang tulo ka dinakpan nga mipahigayon sa pagsuyop sa gituohang shabu.
Nakompiskar sa kapolisan ang mga ebidensiya sama sa mga kagamitan sa pagsuyop og ginadiling drugas ug usa ka pakete nga adunay mga salin sa gituohang shabu.
Ang tulo kasamtangang gipriso sa Station 1, samtang giandam pa ang kasong ipasaka batok kanila. - Bong Soriano