Nahitabo kini alas 4 pasado ang takna sa hapon niadtong miaging Huwebes sa Sitio Santo Niño, Manlapay Dalaguete sa utlanang barangay sa lungsod sa Argao.
Ang natigbasan mao si Teoderico Barrit Sandoval Jr., 36 anyos, minyo ug usa ka mag-uuma nga taga Santicon, Badian.
Ang gipasanginlang nanigbas mao si Danilo Sandoval Doherme, 21 anyos, ulitawo ug silingan lamang sa biktima.
Si PO3 Cristopher Requina sa Dalaguete Police Station nga gikahinabi sa Banat News miingon nga nag-inom ang biktima ug ang mga higala niini sa panimalay ni Pacunda "Onding" Amorado.
Nahiagi si Doherme ug kalit lamang usab nga gilabay sa uyoan og baso nga maoy nakaingon sa pagkapusgay niini ug ang suspetsado kalit lang miibot sa gitakin nga sundang ug gitigbas makadaghan.
Dugang pa ni PO3 Requina nga unang naigo sa pagtigbas ang liog ni Sandoval ug nagkawilkawil na lamang ang liog nga naigo sa unang pagpanigbas ug giusban pa gayod sa makadaghan hangtod nga namatay.
Human sa maong pagpanigbas ang suspetsado dali usab nga misibat pahilayo ug didto kini motahan sa Argao Police Station.
Si PO3 Arnold Abenir sa Argao Police Station nga gikahinabi sa Banat News miingon nga gihatod si Dohemer sa Dalaguete Police Station.