Ang maong mga RMG gikan pa sa Sibonga ug i-apod-apod unya sa mga police stations ilabi na sa Waterfront police station nga maoy nagbantay sa Basilica Menore del Sto. Niño , Plaza Independencia, Fort San Pedro, Malacañang sa Sugbo, Colon, Magellan's Cross ug uban pa.
Matud pang Supt. Melvin Gayotin ang direktor sa CCPO nga sukad niadtong milabay'ng tuig duna nay kapin 20 ka polis ang iyang gipalabay gawas sa CCPO gumikan sa ilang mga pagpabadlong.
Samtang duna say daghang mga polis nga miretiro ug moretirohay pa karong tuiga maong dunay kakulangon sa polis sa dakbayan ilabi na karong umaabot nga ASEAN Summit.
Ang maong mga polis dugay nang gipangayo ni Gayotin sa Police Regional Office 7. Duna nay 75 ka mga RMG karon sa dakbayan ug giapod na kini sa ubang mga polis stations ug special units.
Sa pagkakaron ang CCPO duna ray 900 ka mga polis nga maoy mobantay sa 1.5 milyones ka mga tawo nga dunay ratio nga 1:800 kun usa ka polis maoy pabantayon sa 800 ka mga tawo.
Ang hustong ratio mao gyud ang usa ka polis matag 500 ka mga tawo.