Ang pipila ka mga nagpakabanang molupyo sa nahisgutang barangay misumbong sa Banat News niining maong gihulagway nila nga kahiwian.
Gani kining maong reklamo gikonpirmar ni Apas barangay councilor Ramil Ayuman ug gitug-an niini dihang nahinabi sa Banat News nga tinuoray nga gipaabangan ni kapitan Rosales ang maong outpost nila sa tanod.
Apan si Rosales, dihang nahinabi sa Banat News pinaagi sa telepono mihimakak nga iyang gipaabangan ang maong outpost apan iyang giangkon nga siya maoy nanag-iya sa mga paninda nga pagkaon sa maong lugar.
Gidugang ni Rosales nga wala pay bulan sukad niya gitindahan ang maong outpost ug gani iyang gitug-an nga padayon pa karon niyang giasikaso ang paglukat og business permit niini.
Giklaro sab ni Rosales nga dugay nang gi-demolish ang outpost nila sa maong lugar human wala mosugot ang tag-iya sa maong luna ang pamilyang Mercader.
Kini maoy hinungdan nga iyang gihangyo ang maong pamilya nga siya maoy mobantay sa maong luna aron dili puy-an og mga squatters hinungdan nga nakahunahuna siya pagbutang og gamay'ng paninda sa pagkaon sa maong lugar.
Apan sukwahi ang maong pamahayag sa giluwatang pamahayag ni Ayuman gumikan kay gibutyag niini nga niadto pang milabay'ng tuig nga tinguhang paabangan sa ilang kapitan ang maong outpost apan wala kini mahinayon human gipakgang nilang mga sakop sa konseho.
Apan karong bag-o gihinayon na gyud sa kapitan ang pagpa-abang sa maong carenderia sa maong outpost sa barangay.
Si Rosales una nang nakontrobersiyal usab pipila ka buwan na ang milabay dihang gibadlong usab kini sa iyang mga sakop sa konseho tungod sa pagpaabang sa taas sa ilang barangay hall sa mga taga Manila nga nag-study tour dinhi sa Sugbo.