Ang grupo ni Inspector Eleazar Abrigana uban sa mga sakop sa Barangay Intelligence Network misikop sa 11 ka mga babaye diha sa nahisgutang lugar niadtong Martes sa kaadlawon.
Ang mga nangadakpan nag-edad pa og 18 ngadto sa 43 anyos, pulos gidudahang mga nagbaligya og unod.
Ang operasyon gilusad gumikan sa mga reklamong nadawat kabahin sa ilang presensya sa maong lugar nga walay paigong rason.
Samtang nianang pagkagabii sa samang adlaw, si Konsehal Agustus Pe Jr. gikatahong mitawag sa maong police station gumikan sa naagian niini nga mga babayeng gidudahang nagbaligya sa ilang dungog sa susamang gabii.
Ang grupo ni SPO1 Elmo Rosales daling miadto sa maong lugar ug nasikop ang walo ka mga babaye nga susama og pangidaron sa mga naunang nadakpan.
Ang mga nadakpan gipamulta ngadto sa piskalya. Sumala pa sa kapolisan nga kanunay nang magbalikbalik sa maong lugar ang maong mga babaye bisan makadaghan nang madakpan gumikan kay dali ra silang makagawas tungod usab sa kagamay sa multang gisilot kanila.