Gipadayag ni Maria Pino, tsirman sa CCUVA nga gipaningkamotan karon nila nga malimpyohan ang 14 ka mga lugar nga girekomendar sa Citom ngadto kang Mayor Tomas Osmeña nga ipa-demolish.
Gisugdan dayon sa CCUVA ang maong clearing operations human pormal nga gipadala sa Squatters Prevention Encroachment and Elimination Division (SPEED) ang mga notisya sa demolisyon gikan sa consultant sa Urban Poor sa City Hall nga si Gerry Marquez.
Gikonpirmar sab ni Marquez dihang nahinabi sa Banat News nga niadtong Huwebes pormal na nilang napadalhan og notisya ang mga vendors sa katorsi ka mga lugar nga girekomendar sa Citom nga ipa-demolish.
Matud ni Marquez gitagalan lang og 15 ka adlaw ang maong mga vendors sa boluntaryong pag-demolish sa ilang mga stalls nga naka-atang sa sidewalk human niini madawat ang maong notisya.
Sentro sa nagpadayon karong clearing operations sa CCUVA mao ang mga sakop niining vendors sa Colon Area ug karung semanaha isunod nila ang mga vendors kilid sa Basilica Menore del Santo Nino.
Nasayran nga libo-an ka mga vendors nga sakop sa CCUVA ang nag-rally sa City Hall niadtong miaging semana aron ipadayag ang ilang pagsupak sa nakab-ot nga desisyon ni Mayor Osmeña pagpa-demolish sa ilang pagpaninda nga maoy ilang gisaligan sa adlaw adlaw nilang panginahanglan.
Apan wala mausab ang baruganan sa mayor tungod kay determinado kining limpyohan ang mga sidewalk ug ang mga pedestrian nga gi-okupahan na karon sa daghang mga vendors ug nakahatag og kahasol sa publiko ingon man sa trafiko.