Gawas sa pagkaputol sa wala nga bukton, nabungkag pa ang walang bahin sa lawas niini ug wala nga nawong agi sa splinter sa biktimang giila nga si Nelson Ynot, 40, ug ang anak nga si Joel, ulitawo, pulos lumolupyo sa Bagay Daanbantayan.
Samad sa bukobuko ang bugtong naangkon ni Joel tungod kay dili kini maoy migunit sa dinamita sa dihang giduslitan na ang pabilo aron ilabay.
Base sa imbestigasyon sa kapolisan pinaagi ni PO3 Catalino Rusell ug PO1 Ryan Castro nasayran nga ang amahan ug anak sakay sa pumpboat sayo sa buntag aron managat sa maong lugar apan nagdala diay kini og dinamita aron ilang gamiton sa ilang pagpanguha og isda.
Nasuta nga si Nelson maoy nagkupot sa dinamita sa dihang dayon na unta kini ilabay, apan giingong nakabuto na kini sa iyang walang kamot.
Apil sa nabungkag ang pumpboat nga gisakyan sa mga biktima.
"Walhon tingali ni si Nelson kay pulos wala ang samad niya, pirme na seguro ni migamit og dinamita, pero karon lang nataymingan nga nibuto," matud ni PO1 Castro sa dihang nahinabi sa Banat News.
Ang duha nabangalan sa laing mananagat ug gipasakay sa pumpboat.
Gidali pagdala sa Daanbantayan District Hospital apan daling gibalhin sa usa sa mga tambalanan dinhi sa Sugbo.