Mga kapitan mobabag kang Leyson

Mga kapitan sa Barangay Manipis, Lawaan 2 ug 3 dakbayan sa Talisay mibabag sa application ni Konsehal Gabriel Leyson isip botante sa siyudad.

Si Rey Oliver Berador, Joel Nacor ug Ramil Manayon miduso sa ilang reklamo sa buhatan ni Corazon Moran, Comelec officer sa Talisay.

Matud sa tulo nga hugtanon silang mobabag sa pag-aplay ni Leyson isip rehistradong botante sa Talisay tungod kay dili kini usa ka residente sa Talisay.

Si Leyson usa ka kompirmadong residente sa dakbayan sa Sugbo ug miyembro sa Konseho sa maong siyudad.

Kahinumduman nga si Leyson mikompirma kabahin sa iyang pagdagan isip mayor sa Talisay karong 2007 nga piniliay ug miangkon usab kini nga usa ka Talisaynon tungod kay kanhi nagpuyo siya diha sa Barangay Lagtang niadtong tuig 2001-2002.

Apan si Celiapo Cabuenas, barangay kapitan sa Lagtang miduso usab og affidavit nga nagkanayon nga sukad sa iyang pagkatawo residente na siya sa nahisgutang barangay.

Si Cabuenas mihimakak sa pangangkon ni Leyson nga usa siya ka residente sa Lagtang.

Si Cabuenas mipasangil nga bag-o lang si Leyson nagpatukod og balay diha sa lugar nga walay barangay clearance ug building permit gikan sa siyudad ug ang pangalan ni Leyson wala malakip sa talaan sa mga residente sa barangay sukad siya napiling kapitan niadtong 2002 hangtud niining tuiga.