Mangaoang subo nga mibiya sa BOC-Cebu

Giangkon ni Customs Collector Ma. Lourdes Mangaoang nga masulob-on siya sa iyang pagbiya sa Port of Cebu kagahapon human siya pulihi ni Collector Ricardo Belmonte.

"When I came here I did not ask for this position. I was assigned here on the basis of my performance," nagkanayun si Mangaoang.

Matud pa ni Mangaoang nga dili makiangayun ang mga pasangil nga bati ang iyang performance sanglit makita nga mas arang-arang pa ang performance sa Port of Cebu itandi sa ubang puerto.

Si Mangaoang miduaw sa buhatan ni Mayor Tomas Osmeña kagahapon aron magpasalamat sa suporta niini ug sa mga Sugboanon.

Gitumbok ni Mangaoang nga ang dili maayong sitwasyon sa politika ug ekonomiya ang hinungdan sa dili maayong koleksiyon ug dili tungod kaniya.

Gipasabot ni Mangaoang nga bisan unsaon pa sa paningkamot, walay kolektahonon kon walay importasyon.

Natandog si Mangaoang sa pagduol kaniya sa mga batang kalye sa dakbayan sa Sugbo ug gipasalamatan siya sa iyang tabang pinaagi sa pagpasiugda og Fun Shooting Competition.

Ubos sa administrasyon ni Mangaoang, gitabangan usab niya ang housing project sa Gawad Kalinga diin nakahinabang siya og P450,000.

Gipasegarbo usab ni Mangaoang ang malampusong pag-host sa Port of Cebu sa niaging Asean Customs Directors-General meeting.

Nagpasalamat nalang si Mangaoang sa tanang nisuporta kaniya lakip na sa mga sakop sa media ug iyang mga sakop sa Port of Cebu nga nipakita og maayong pagtratar kaniya.