Electrician gipusil gawas sa iyang balay

Usa ka lalaki ang gipusil patay sa wala pa mailhing mamumuno samtang ang biktima migawas sa iyang panimalay diha sa San Jose extension, Sitio Chicos, Tisa ning dakbayan kagahapon sa kaadlawon.

Ang biktima giilang si Cidrick Emphasis, 48, usa ka electrician ug residente sa Sitio Nangka sa samang barangay.

Wala bisan usa ka tawo ang nakatumbok kung si kinsa ang mipusil sa biktima.

Sumala pa sa report sa Homicide Section subay sa pamahayag sa kapuyo niini nga si Lily Molina tupad pa silang natulog sa biktima nianang Biyernes sa gabii.

Wala siya makamatikod nga migawas kini sa ilang pinuy-anan ug diha nalang niya mahibaw-i gikan sa ilang mga silingan nga gipusil kini diha sa gawas.

Ang biktima nakaangkon og samad pinusilan diha sa iyang tangkugo ug aping nga miresulta sa iyang hinanaling kamatayon.

Gisusi na karon sa kapolisan ang rekord niini sanglit dunay mga migawas nga report sa mga lokal nga sibyaanan nga nalambigit kini sa mga pagpangawat diha sa maong lugar.