Kini ang nasayran sa Banat News kang Konsehal Allan Borbajo nga maoy chairman sa committee on police, fire and penology sa konseho sa maong dakbayan.
Giklaro ni Borbajo nga walay suliran ang kuwarta alang sa pagbayad sa binulang abangan sa maong mga sakyanan sa RDAK Transport Inc. tungod kay may kuwarta man nga ikabayad alang niini.
Gipasabot ni Konsehal Borbajo nga ang proseso gayod sa pag-andam sa mga dokumento maoy nakaingon sa nalangan nga pagbayad sa mokabat P3 milyones nga obligasyon.
Miingon si Borbajo nga gihimo karon nila ang tanang pamaagi nga masulbad ang maong suliran sa kapolisan nga magpadayon ang inadlaw nga kalihokan sa kapolisan sa pagmintinar sa kahapsay ug kalinaw.
Sa nasayran nga ang kagamhanan sa dakbayan ang nag-abang og walo ka patrol car, unom ka multicab ug duha ka meat van sa RDAK Transport Inc. sa kantidad nga P1.025 milyones ang matag bulan.
Si Senior Superintendent Eduardo Catabas nga gikahinabi sa Banat News miingon nga mokabat sa 230 ka sakyanan alang sa kapolisan ang mahidangat karong sunod bulan.
Dugang pa niya nga gawas sa mga sakyanan may mga motorsiklo usab nga maoy gamiton sa kapolisan sa umaabot nga 12th Association of Southeast Asian Nation (Asean) Summit karong Disyembre.
Matud pa niya nga sa kasamtang maoy iyang gihimo ang gipalig-on usab ni Catabas ang police visibility pinaagi sa pagdistino ug mga beat police sa matag dapit sa dakbayan.
Gipadayon usab ang higpit nga pagbantay sa Marcelo Fernan Bridge ug Mactan Mandaue Bridge pinaagi sa bridge police nga sakyanan nga nadawat gikan sa kagamhanan sa lalawigan.