Ang biktima mao si Thadeos Bataluna Sanoria, 30, ulitawo lumad sa Suba, Danao ug gituuhang asset sa Criminal Investigation and Detection Group (CIDG-7).
Ang mga suspetsado mao si John Jason Manco Gonzales, 17, ug Ronnie Mata Miro, 20, mga ulitawo ug lumad sa Sitio Lapu-Lapu, Suba, Danao.
Base sa imbestigasyon ni PO3 Glen Manulat sa Danao Police Station nagtug-an nga samtang mitubag sa alarma sa pagpamusil duol sa ilang dapit si PO3 Alvin Bayo sa CIDG-7 mipugos pagkuyog si Sanoria sa maong alarma.
Wala makabantay si PO3 Bayo ug Sanoria nga adunay mga tawo nga naghupohupo sa daplin sa ilang giagian ug dayong pamusil ngadto kang Sanoria.
Si Sanoria nga samaran sa iyang walang ilok gidali kini pagdala sa Danao District Hospital apan gideklarar kini nga dead on arrival (DOA).
Si Gonzales buot unta nga mosibat sa maong dapit apan nasikop kini sa mga mirespondeng team sa kapolisan sa Danao atol sa hot pursuit operation. Si Miro pormal kining mitahan sa iyang higalang polis sa Danao nga si SPO1 Lolito Oliverio ug kasamtangan kining gibilanggo sa Danao Police Station.
Si Gonzales gawas sa iyang pagkalambigit sa pagpusil patay kang Sanoria nakuhaan usab kini sa kalibre .38 nga armas nga mobuto diin maoy gigamit pagpusil sa biktima.