Naaktuhan pa gikan sa posesyon sa polis nga si PO1 Richard Rosacena ang mga shabu sniffing paraphernalia ug usa ka dili lisensyadong kalibre 45 pistola nga paltik nga may sulod nga usa ka magazine ug may lima ka buhing bala.
Ang grupo ni SPO1 Filomeno Mendaros, PO2 Edward Abatayo, PO2 Joel Cunan, PO2 Melbert Dio sa Criminal Investigation and Intelligence Branch sa Cebu City Police Office maoy mialirong sa panimalay nga gipanag-iya ni Agnes Leah Montebon, hingkod ang panuigon.
Ang maong panimalay gidudahang usa ka drug den base usab sa mga nadawat nga impormasyon sa CIIB.
Sumala pa sa kapolisan nakadawat sila og impormasyon gikan sa ilang miyembro sa Barangay Intelligence Network diha sa maong lugar kabahin sa presensya sa usa ka armadong lalaki nga misulod sa maong balay.
Tuod man dihang gialirungan, nadakpan si Montebon ug nakuhaan kini og 40 ka mga aluminum foils, 15 ka linukot nga aluminum foils, cutter ug metal clip nga gidudahang gamit sa pag-suyop.
Nadakpan usab si Rosacena diha sa sulod ug nakuhaan sa nahisgutang mga ebidensya, walay napakitang ligal nga dokumentos si Rosacena sa iyang armas.
Si Supt. Pablo Labra ang hepe sa CIIB mitug-an nga ilang irekomendar si Rosacena ngadto sa Police Regional Office 7 aron pasakaan kini og kasong administratiba gumikan sa kasong pagbisita niini sa usa ka drug den sa maong lugar.
Kagahapon gimando ni Labra nga ipailawom sa drug test si Rosacena.
Sa pakighinabi sa Banat News kang Rosacena kusganon kining mihimakak nga tiggamitan sa drogas apan miangkon nga kaniadtong di pa siya sakop sa kapolisan mogamit siya niini.
"Sa una ra ko niundang sa drugs sibilyan pa ko," asoy pang Rosacena kinsa mirason nga igo lang siyang nakigtabi kang Montebon niadtong tungura dihang niabot ang mga polis ug gidakop silang duha.
Si Rosacena kahinumduman niadtong pipila na ka adlaw ang milabay gidakop sa mga sakop sa Mobile Patrol Group gumikan sa sumbong sa mga tawo kabahin sa usa ka polis nga nanghasi sa samang barangay.
Nasuta gikan sa hepe sa Station 1 sa MCPO nga si Rosacena nag-AWOL niadtong mga tungura.
Kasong paghupot sa di lisensyadong armas, drug paraphernalia ug administratiba ang giandam sa CIIB batok sa maong polis.