Pero dili sa dakbayan sa Sugbo nahitabo kun dili didto kini mahitabo sa Mananga 2, Tabunok, Talisay sa miaging adlaw alas 2:00 sa kahaponon samtang ang biktima gaduwa og mahjong diha sa punoan sa kahoy nga talisay.
Ang biktima naila nga si Juan Encarnacion, 38, minyo, nagpuyo sa maong lugar ug lumad nga taga Mabinay Negros Oriental.
Si Encarnacion naigo sa bala sa .45 pistol diha sa iyang ulo nga maoy gikamatyan dihadiha.
Matud pa sa kapolisan sa Talisay nga ang wala mailhing tawo giingong nagbonnet sa iyang nawong ug nagsul-ob og helmet nga nagpaingon sa biktima dayong ibot sa dala niining armas ug gipusil makausa ka higayon tumong sa ulo.
Human mahagba ang biktima sa yuta, yano ra kaayo nga naglakaw ug nagtugon pa ang mamumuno sa mga nakasaksi sa dili pagsunod kaniya, balik sa nagpaabot nga laing kauban nga naglingkod sa Aura MC nga motor, dayong sirit ang duha luwan sa motorsiklo.
Daling miresponde ang kapolisan sa nahitaboan, apan pakyas sa pagsikop sa suspetsado.
Si PO2 Leandro Azarcon sa Talisay City Police sa pakighinabi sa Banat News miingon nga ang biktima mao kini mopalit sa tanang mga kinawat, mga cellphone nga gipanglabni diha sa Tabunok aron iyang paginansiyahan.
Ang kapolisan sa Homicide Section sa Talisay padayon pa sa gihimong imbestigasyon aron sa pagtino sa motibo sa krimen.
Duha ka anggulo ang gitutokan karon sa kapolisan una ang personal ug ang vigilante.