Ang biktima giilang si Jaqueline Jabonero,27, molupyo sa Ponce Capitol, Greenhills, Capitol Site ning dakbayan.
Sumala pa ni Simplicio Jabonero, 52, amahan sa biktima sa pakighinabi sa Banat News sa telepono kagahapon, niadto pang Lunes sa alas 6 sa hapon nadangat sa maong tambalanan ang iyang anak gumikan kay manganakay na kini.
Matud pa niya nga ang igsuon sa biktimang si Jasmin, 25, maoy nagbantay sa maguwang niini samtang kini nagbati, gani diha siya sa iyang trabahuan dihang gipahibalo ni Jasmin nga naglisod ang biktima sa iyang pagpanganak maong iya kining gisultihan nga ipa- caesarean nalang aron di na maglisod ang pasyente.
Gikatahong mipasalig ang mga doktor sa maong tambalanan nga OK ra ang kahimtang ni Jaqueline kay madala ra og normal nga pagpanganak, apan nianang pagka-alas 9 na sa gabii namatay ang iyang anak.
Giingong nagdugo pag-ayo si Jacqueline matud pa ni Simplicio base usab sa gitug-an kaniya ni Jasmin nga mao usab ang gibutyag sa doktor.
"Ang ako ana, nagpabaya ra gyud sila sa ilang pasyente, mura'g ila rang giduwa-duwaan ang kinabuhi sa akong anak," asoy pa sa amahan sa biktima.
Ang biktima mi-avail sa package deal sa maong tambalanan nga sugod sa pag-prenatal sila nay moalima sa mabdos hangtud nga kini manganak diha sa ilang tambalanan.
Gibasol karon sa amahan sa biktima ang mga doktor ug ang tambalanan sa nahitabo sa iyang anak gumikan kay alang kang Simplicio diha na magpaalima ang iyang anak sukad sa pagmabdos niini nasayod na silang daan sa kahimtang sa pasyente.
Ang patay'ng lawas sa biktima gipa-awtopsiya na sa mga kabanay niini.
Planong pasakaan og kaso ni Simplicio ang tambalanan ug mga doktor human sa lubong sa iyang anak ug apo karong Domingo.